Xoán Crujeiras

O cociñeiro

O gusto é o motor que move a vida de Juan Manuel Crujeiras. Tanto polo produto e por acadar o mellor sabor como por facer que os que entran no seu restaurante se sintan felices. "A clave é cociñar a gusto". "Ás veces dinme que o que preparámoslles trae lembranzas da súa infancia ou dalgunha persoa querida e iso é un triunfo para min".  

Nesa filosofía de estar a gusto, o equipo humano é fundamental: "podes ser un magnífico cociñeiro pero, sen un bo equipo, todo iso se perdería", por iso lle gusta rodearse de grandes profesionais, que sexan cercanos e fagan sentir cómodas ás persoas que se achegan ao seu restaurante. "Queremos que os despidan co mesmo agarimo co que os recibiron; a un restaurante vas pola fama pero voltas pola boa cociña e o bo trato". 

Podería parecer que sempre tivo moi claro a que se ía dedicar pero, en realidade, foi a cociña quen o encontrou a el: "Son cociñeiro, non por vocación, senón por casualidade. Alguén cercano nalgún momento pensou que me podería gustar, e a casualidade me levou namorar do que é agora o meu hobby, a miña paixón e a miña forma de vida". Foi todo un acerto: "Na vida, como na cociña, todo é probar". 

Tras atopar o seu camiño seguiu adquirindo experiencia en diversas cociñas de Galicia ata acadar un dos recoñecementos máis importantes da súa vida profesional, abrir o seu primeiro restaurante,A Estación (Cambre): con el, entre outros moitos recoñecementos e satisfaccións,acadan unha estrela Michelin e un Sol Repsol.Agora compaxina o seu novo proxecto, Bido, coa súa tarefa como profesor no instituto Fragas do Eume en Pontedeume, onde trata de trasladar a súa experiencia ás novas xeracións de cociñeiros.

Gústalle aproveitar os coñecementos, os sabores tradicionais ea súa experiencia vital como fontes de inspiración, pero partindo sempre dun bo produto: "A cociña é un sentimento, debe saír de dentro e converterse en algo especial para aqueles que a queiran compartir contigo". Para iso resulta fundamental a cercanía. "Non me gusta que o protagonismo estea demasiado centrado no cociñeiro; debe estar no cliente porque é o seu momento e a súa experiencia, despois estamos nós".